Wow! What a donation.

सभासद्द्वारा एक करोड दान

पोखरामा सुरु भएको श्रीमद्भागवत राष्ट्रिय विराट ज्ञानमहायज्ञमा एक सभासद्ले एक करोड रुपैयाँभन्दा बढी दान गरेका छन् । पहिलो दिनमै आश्चर्यजनक रूपमा तीन करोड रुपैयाँभन्दा बढी संकलन भएको छ । क्षेत्री समाज पोखराको आयोजनामा सोमबारदेखि पोखरामा सुरु भएको श्रीमद्भागवत राष्ट्रिय विराट ज्ञानमहायज्ञमा उद्योगपति एवं सभासद् सूर्यबहादुर केसीले एक करोड एक लाख दान गरेका हुन् । कार्यक्रमका प्रमुख अतिथि बनेर मञ्चमा बसेका केसीले उक्त रकमबराबरको चेक आयोजकलाई हस्तान्तरण गरेका थिए । चेक हस्तान्तरणपछि केसी परिवारलाई अभिनन्दन गरिएको थियो ।

शिक्षा, स्वास्थ्य, बैंक, हाइड्रोपावर तथा विभिन्न उद्योगका सञ्चालक रहेका केसी राष्ट्रिय प्रजातन्त्र पार्टीका सभासद्समेत हुन् । करिब १० करोड रुपैयाँ संकलन गर्ने उद्देश्यले आयोजित महायज्ञमा पहिलो दिनमै तीन करोडभन्दा बढी संकलन भइसकेको छ । महायज्ञको उद्घाटनमा सहभागी भएकी पूर्वमन्त्री रोशन कार्कीले पनि ४० लाख रुपैयाँ दान गरेकी छिन् । यसैगरी, प्रेमबहादुर जिसीले पाँच लाख दान गरेका छन् । सो अवसरमा स्थानीय लक्ष्मण कार्कीले पोखरा-१४ को एक रोपनी जग्गा आयोजक क्षेत्री समाजलाई दिने घोषणा गरे । उनले नगदसमेत दान गरेका थिए ।

लोककल्याणकारी बहुउद्देश्यीय भवन, संग्रहालय, पुस्तकालयलगायतका पूर्वाधार निर्माण गर्ने उद्देश्यले आयोजना गरिएको महायज्ञ नौ दिनसम्म चल्नेछ । महायज्ञमा पण्डित कमलनयन गौतमले वाचन गर्दै छन् । उद्घाटनअघि पोखराको बगरबाट निस्केको विभिन्न झाँकी, भजन-कीर्तन, नाचगानसहितको र्‍याली बजारका विभिन्न भागको परिक्रमा गर्दै नयाँबजारस्थित महायज्ञस्थलमा पुगेको थियो । हजाराँैको सहभागिता रहेको र्‍याली कार्यक्रमस्थल आइपुग्न चार घन्टा लागेको थियो ।