Ramkeshar’s World

A Complete Website

के विधि हल्ला फैलिएको हो यस्तो ?


के विधि हल्ला फैलिएको हो यस्तो ?

तराईतिर अहिले बच्चा अपहरणको हल्ला आतंक यति मच्चिएको छ कि बिनसित्तिमा निर्दोषले कुटाइ खानु परिरहेको छ। एक दर्जनभन्दा बढीलाई त जलाएर वा कुटेरै मारेको छ भीडले। कतिले त डराएर स्कूलै पठाउन छोडेका छन्।

हल्ला यति बढेको छ कि आफ्नै परिवारका बच्चा बोकेर हिँड्दा पनि अर्काको बच्चा अपहरण गर्‍यो भन्ठानेर आक्रमण हुन थालेको छ।

झापामा आफू कालो र नातिनातिना गोरो रङ्गको भएका कारण अर्काको बालबालिका अपहरण गरेको आरोपमा एक हजुरआमाले पटक पटक कुटाइ खानुपरेको खबर सुन्दा निकै दुःख लाग्यो।

तोपगाछी-८ बस्ने पवित्रा निरौला छोरीपट्टीका नातिनातिनालाई साथमा लिएर नजिकको क्याम्पा बजार पुगेकी रहिछिन्। त्यहाँका बासिन्दाले अर्काको बालबालिका अपहरण गरेको भन्ठानेर कुटपिट गर्न थालेछन्। बल्लतल्ल दमक प्रहरीले उनलाई उद्धार गरेछ।

इलाका प्रहरी कार्यालयले सुरक्षाका लागि उनलाई रातभर कार्यालयमा राखेछ। बिहान स्थानीय व्यक्तिको जिम्मामा बुझाइएछ। तर उनी त्यहाँबाट केरखा बजार पुग्दा त्यहाँ पनि बालबालिका अपहरण गरेको भनेर फेरि कुटिएछ।

त्यसपछि उनलाई प्रहरीले तोपगाछीका स्थानीय व्यक्तिहरूको जिम्मा लगाएछ। उनी कालो र नातिनातिना गोरो भएका कारण हल्ला फैलिए अनुसार भारतीय मूलका अपहरणकारी ठानेर उनलाई कुटपिट गर्ने रहेछन्।

Advertisements

May 19, 2009 Posted by | Out of Track | Leave a comment